初試牛刀 呢幾日我第一次出去幾間大學講talk，等左咁耐，我終於係公司做左我最應該做既野喇。 以前我冇諗過自己會真係去講一場seminar。好記得我報呢份工既時候，見到job description寫住要去學校講talk，我即刻幻想對住以前o的同學, 老師，係佢地面前以另一個身份去講talk係幾型，都幾岩我。但係坦白講，o個時真係冇諗過會成真囉。 到左我入到黎，我再唔係覺得要講talk係好型，而係有o的驚，驚自己根本就講唔到。其實冇咩邏輯既，只係感覺。覺得呢樣野黎我好遠，但係我幾個月後就要去做。 到左上個月，我應該去講第一次talk，不過因為流感同其他原因，我冇去到。雖然好想試，好想證明俾自己睇，因為講talk 先係我入黎最主要既role，但係就一直拖到今個月尾我先有呢個機會。 9月頭其實我有講過，不過對住班小六學生，完全唔係o個回事啦。 上個星期終於係我處女下海，等左咁耐，練左咁耐，終於有機會俾我表演。跟同事落City 用英文講左一個鐘, 第二晚就係金鐘office既seminar room對住公司同事同埋出面o的人講, 隔一日之後就隻身走上中大一條友再講。三場緊接住既talk 將我極速洗禮，由懷疑到肯定，俾左我無限信心。 由我初初入大學present 2,3分鐘都驚，到覺得學校present都不外如是；由見工o個時擔心20分鐘 present點講到咁多，到講左一個鐘seminar，呢一刻我都幾滿意。 我唔係想講自己好醒好叻，我只係想講我終於做到我一直想做既事，諗左咁耐既事終於都成真。其實試過講先會發覺好多人都做到，例如平時你o的TA，Professor, 電台DJ，主持等等，佢地都係用把口搵食，係你平時唔覺，以為人地好容易，冇諗過原來真係做起上黎都唔係咁簡單。 雖然我而家都覺得講一場seminar都唔係咩難事，不過我以前真係冇諗過自己會做到。第一次講之前有好多心理準備, 不斷同自己講今次都係好似以前學校o的present姐，只不過長o左的，之如此類既說話。講真，其實要做既野都做哂，真係冇咩好驚，但係人對住未知既事同第一次做既事點都會緊張。 我希望自己唔單只由懷疑到肯定，而係繼續可以由肯定去到輕鬆，呢個係我呢一年既目標。當然，講到同講得好又兩回事，呢個都係我要keep 住努力既事。不過講seminar o個刻見到下面o的人既反應所帶黎既成功感，同講完之後既輕鬆係我呢排最enjoy既野。 星期五係中大講完talk搵番o的舊朋友，有咩講咩既o個種感覺真係好relax 而家我應該recharge好喇，之前一直有種壓住壓住既感覺唔知自己可唔可以勝任講seminar呢個role, 而家我有答案喇。星期一 GET SET GO! btw, 今日遇到o的好奇妙既事，唔係單單無啦啦識左個人咁簡單...總之真係好得意… | 
